بوست من الكاتبه دنيا حسين
الأربع صور دول كانوا إنجاز السنة اللي فاتت ❤️💕 كان البطل الرئيسي فيها هو بابا اللي دايمًا بيشجعني إني انجح وأكون أفضل، ربنا ما يحرمني منه😍❤️
بالرغم من إن سنة 2020 كانت من السنين الصعبة اللي عديت عليا بس كل مرة كنت بمر بموقف صعب كنت بعافر وبسعى لحد يعدي
..
السنة اللي فاتت بدأت بإعلان عن صدور غلاف روايتي "أمرخ"، وبعدها بدأ معرض القاهرة الدولي للكتاب وكانت المرة الأولى اللي روحت فيها كاتبة مش قارئة بس، وعملت حفل توقيع في معرض الكتاب هو أينعم محضرش ناس كتير بس أنا كنت مبسوطة بالانجاز ده، بعدها بشهور مضيت عقد روايتي التانية "خاتم الأرواح" اللي -إن شاء الله- هتنزل في معرض الكتاب الجاي، وبالرغم من إن الرواية دي تعبتني لأني عدلتها وراجعتها عشروميت مرة😅
وأحلى إنجاز في السنة اللي فاتت إني بقيت بكتب قصص في قناة حكايات وروايات وقصصي بتعمل أعلي المشاهدات وبتعدي نص مليون مشاهدة، وبقى ليا متابعين على القناة بتتنظر قصصي ويدوروا على صفحتي الشخصية ويبعتولي إن القصص عجبتهم.
ده غير مقالي عن روايتي أمرخ في جريدة الدستور، وكمان القصص اللي كتبتها في جريدة المساء العربي الورقية والإلكترونية..
ده غير شغلي في التدريس اللي قضى عليا الحمد لله بقرارتهم بقفل المدراس كل شوية😂
بالرغم من إن السنة اللي فاتت كانت سنة صعبة بس أنا عافرت ولسه بعافر عشان أحقق باقي أحلامي لأن لسه فيه أحلام كتير لازم تتحقق وهتتحقق بتيسير ربنا وإني أسعى ورا أحلامي، اتمنى السنادي يكون فيها إنجازات كبيرة واحقق فيها معظم أحلامي.
مع إني مبقتش أحب أنزل حاجة عني، بس أنا محبطة اليومين دول ولازم اشجع نفسي عشان يرجع حماسي وشغفي من جديد إني أكمل باقي أحلامي.
#دنيا_حسين
تعليقات